Chesta è a' Terra Mia

CHESTA E' LA TERRA MIA
Si viri no paese abbandonato
co quatte case nzimma a no sderrupo,
na vecchia ca è cchiù vecchia re le mmura,
cchiù ghianca re le prete re la via ...
Chesta è la terra mia!
Si truovi na c mpagna senza grano,
na vigna ntesecata e no pagliaro,
no viecchio co lo cane e l'accettodda,
le mmane spertusate ra le serchie ...
Chesta è la terra mia!
Si passi pe nu vosco solitario
e no craparo canta co passione
na storia re bbreanti e de baruni,
re gelusie, r'ammore e de vendette ...
Chesta è la terra mia!
Si sotto no portone senza luce
nge sta no nome ca nun se capisce,
è no sordato ca morette acciso
senza conosce manco lo motivo ...
Chesta è la terra mia!
Si assenno ra na chiesia, all'intrasatta
te viri nfaccio no vestito ianco,
no velo, li cunfietti co lo grano
e tutto no paese ca face festa ...
Chesta è la terra mia!
Si sotta no castiello co lo lippo
lo mare face l'amore co li scogli,
le barche cunnuleiano nzimma l'onne,
le rezze se stennecchiano a lo sole ...
Chesta è la terra mia!
Si viri na valigia con no tuocco
nzimma a no treno ca vaie a Milano
si sotto na baracca a Francoforte
le llacreme se mmeschiano a la birra ...
Chesta è la terra mia!
Si viri na gaglioffa a primavera
Cu l'uocchi niuri e li capiddi r'oro,
ddoie scocche nfacci e na cammisa aperta,
le menne ca spertosano la vesta ...
Chesta è la terra mia!
Chesta è la terra mia!
Terra r'amore,
terra re stienti,
re sururi e chianti!
la gente è de bon core;
e nun fa nienti
ca se la so scurdata pure li Santi.  

(nella sezione Tutt'attuorn/pisciotta/rodio troverete il video con il testo cantato)